សៀមរាប៖ រាជរដ្ឋាភិបាលបានសម្រេចដាក់ឱ្យដំណើរការសាកល្បងសេវាកម្មរថយន្តក្រុងសាធារណៈដោយឥតគិតថ្លៃសម្រាប់ដឹកពលរដ្ឋពីតំបន់រុនតាឯក ទៅក្រុងសៀមរាប និងពីក្រុងសៀមរាបទៅរុនតាឯក ចាប់ពីថ្ងៃទី១៥ ខែកុម្ភៈ ឆ្នាំ២០២៤ តទៅ។ នេះបើតាមសេចក្តីជូនដំណឹងរបស់រដ្ឋបាលខេត្តសៀមរាប។
ការដាក់ឱ្យដំណើរការរថយន្តក្រុងឥតគិតថ្លៃសម្រាប់ពលរដ្ឋរស់នៅតំបន់រុនតាឯកនេះ ដើម្បីជួយសម្រួលដល់ការធ្វើដំណើររបស់ប្រជាពលរដ្ឋដែលបានស្ម័គ្រចិត្តចាកចេញពីតំបន់រមណីយដ្ឋានអង្គរទៅរស់នៅតំបន់អភិវឌ្ឍន៍រុនតាឯក បំពេញការងារ និងប្រកបរបរចិញ្ចឹមជីវិតប្រចាំថ្ងៃ។
រដ្ឋបាលខេត្តសៀមរាបបានបង្ហាញទីតាំងចំណតនៅផ្សារតំបន់អភិវឌ្ឍរុនតាឯក និងពេលវេលាមានចាប់ពីព្រឹក៥:៣០ ៦:០០ ៦:៣០ ៧:០០ ៨:០០ ១០:០០ និង១២:០០ព្រឹក។ ពេលថ្ងៃចាប់ពីម៉ោង៤:០០ ៥:០០ និង៦:០០ល្ងាច។
ចំណតសួនច្បារហាត់ប្រាណមាត់ស្ទឹងសៀមរាប ចាប់ពីម៉ោង៦:០០ ៦:០០ ៧:០០ ៨:០០ ១០:០០ និង១២:០០ព្រឹក។ ពេលថ្ងៃពីម៉ោង៤:០០ ៥:០០ និង៦:០០ល្ងាច។
សម្តេចធិបតី ហ៊ុន សែន បានប្រកាសផ្តល់សេវារថយន្តក្រុងឥតគិតថ្លៃនេះក្នុងពេលសម្តេចអញ្ជើញជួបសំណេះសំណាល ជាមួយពលរដ្ឋជិត ៣០០០នាក់ រស់នៅភូមិធម្មជាតិរុនតាឯក និងតំបន់ពាក់ស្នែង កាលពីថ្ងៃសុក្រទី៨ ខែធ្នូ ឆ្នាំ២០២៣៕
